Ýowşan Annagurbanyñ Resmi Sahypasy

Goýnuň ölümi

Aýaklaryn güýlüp, ýüňünden süýräp,
damakgan üçin gazylan
çukuruň başyna eltseler goýny,
gapdalynda suwly kündük goýsalar,
gassap ýeňin çermäp, pyçagyn daşa
keýp bilen çalsa gan ysyn küýsäp,
goýun mälemese bolman soň gezek,
bolman bir gezejik baş götermese,
giň dünýäni görjek bolup ýene bir,
bir düwlüp, ýazylyp dyzanmasa ýa,
aýaklarnyň ýüpün çözerin öýdüp,
walla, kim mälejek onuň ýerine,
kim urunjak pyçakdan öň bir gezek,
kim synanjak sypyp gitmäge gaçyp,
bu zatlary goýnuň özi etmeli,
ýogsa-da ölmeli gözleri açyk...

Ataly-ogul

Men ogluma baş kitabym okatdym,
on ýyl iş edinip, iňlisçe ýazyp,
ol meni tankyt etdi:
“Sözlemleriň uzyn, dialogyň kän,
täzeden ýaz!” diýip käýedi gyzyp.

Düýş

Düýş gördüm.
Tejende, şäher parkynda,
bir çüňke ekilen agaçmyşym men,
durmuşym epgege gerip petekäm,
köküm çuňdan urup, ýyl-ýyldan mäkäm,
ýogyn hem boldumly nagyşmyşym nen,
ýeriň synasyna ýaraşyk berýän,
berdaşly gollarym uzadyp çar ýan,
säginip saýamda köçeden barýan,
ýadaw garry ýa-da çagaly gelin,
guwanyp seredýär boýdan-başyma,
gözi gidýän ýaly ýaşan ýaşyma...

Kyn sorag

Çukura gaçana ýa ýykylana,
kömek etjek bolup eliň uzatsaň,
ol elini bermese,
çukurdan çykmaga çekinse, gorksa,
ýa ýatan ýerine höwrügip aşa,
besdir maňa şu çukur,
şu ýerim bolýar diýse,
näme etmeli?
Soň çukura gaçan, ýykylan görseň,
kömek etmek üçin ýoluňdan galyp,
eliň uzatmalymy
ýa-da görmän gitmeli?

Tikenli sim

Tikenli simi gysymlap,
gyrjak bolup dyrjaşsaň,
tiken eliňi dilip,
ýüregiňe sanjylar:
“Çek – diýip – yza eliň!”