Watan serheti

Serhet açyk heroine, zähere,
Emma açyk däl maňa.
Serhet açyk her egriýe, her şere,
Emma açyk däl maňa.

Ony goraýarlar eli ýaragly,
Gara sanaw düzüp, gelip-gitjege.
A men ýaşdym, saklan diýip gygyrdym,
Keýp çekjek bolup ölüp-ýitjege.

Serhet açyk, iş adamy, alçajyk,
Alym bilen, berim bilen şärige.
A men ýaşdym, dilime bek bolmadym,
“Beýtmäliň-ä!” diýdim Muzaň ärine.

Serhet açyk, ha neşe sat, ha adam,
Eliň açyk bolsa, ýoluňam açyk.
Gümrükçi, serhetçi – türkmen oglanlar,
Eliň açman nirä gidersiň gaçyp?

Ýöne diliň açma, dişden aňyrda,
Ýedi däl-de, ýetmiş gulply sakla.
Serhet açyk, näme getir, ne äkit,
Eliň açyk bolsa, bolarsyň hakly.

Serhet açyk, tirýek getir, heroin,
Ýa-da SPID, hakyny ber, ötüber.
Emma meniň üçin açyk däl serhet,
Hemem entek-entek boljak däl, meger...
11.01.09.